“فرضية الحجاب”
هو الحجاب طلب من ربنا لنا فعلا ولا هو تحكم مجتمعي فينا واحنا لابسينه على الفاضي؟
بما ان خلع الحجاب انتشر جدا مؤخرا وبشكل ملفت للنظر.. وطبعا أسباب اتخاذ قرار جرئ زى ده بتختلف من واحدة للتانية…كلامى مش موجه لاى واحدة خلعته نتيجة ضعف ما أصابها، بعد طلاق او مرض او اى ابتلاء تانى، او خلعته نتيجة مرورها بحالة نفسية معينة خليتها تقول انا عايزة ابقى قوية وليا قرار يخصني وحنفذه مهما اعترض الناس، او انا حبقى اللى انا عايزاه مش اللى الناس عايزاه.. يعنى مش لأى واحدة خلعت الحجاب وقلبها بيقول يارب ردني ليه او يارب اموت بيه او يارب سامحني..
كل دى نماذج شوفتها حواليا وبحبهم ❤ وبدعي لهم زى ما بدعى لنفسي.. وكلامى مش موجه لهم..
كلامى انهاردة كتبته لأن صديقة محجبة كلمتني وقالتلي انها تعرف واحدة شالت الحجاب وعماله تقنعها ان الحجاب مش فرض ومش حاجة بترضي ربنا اصلا، ولا بتاخد عليها حسنات، وانها لابساه على الفاضي.. وهى بدأت فعلا تتأثر بكلامها جدا..
يعنى صاحبتها اختارت انها تشيل الحجاب وعايزة تشيله لغيرها 😊
انا سمعت وقريت لمفكرين كتير ضد الحجاب وكلهم تقريبا عندهم نفس الأفكار والأسباب فى عدم فرضية الحجاب اللى هى ححاول اناقشها هنا بالعقل على شكل حوار. أغلبه دار بينى وبين اصدقاء فعلا..
- انا عرفت معلومة غريبة يا رانيا، عرفت ان الأحاديث اللى اتكلمت عن الحجاب احاديث آحاد (يعنى مروية عن صحابي واحد بس ثقة مش صحابة كتير زى الأحاديث المتواترة).. وفى ناس كتير بتشكك فى الأخذ بأحاديث الآحاد دى..
=طيب حتى لو انت مش حاسه ان الأحاديث دى كفاية ما الموضوع فى القرآن نفسه..
- اه بس الكلام عن الحجاب فى القرآن مش مباشر وممكن يتفسر بطرق كتير.. يعنى طالما هو فرض ومهم ليه ربنا مقلناش كده مباشرة، البسوا الحجاب وبالشكل المحدد ده؟
= اولا اعرفي ان مفيش حاجة بلفظ الحجاب تخصنا فى الدين عشان ربنا يكتبها مباشرة.. كلمة حجاب كلمة عامة مدلولها الستر.. واحنا بنستخدمها بمعنى غطاء الشعر والجسم.. ايه اللى مش مباشر فى آيات القرآن عن الحجاب فى رأيك؟
- هو فى ايتيين فى القرآن الناس بتقول عليهم للحجاب.. واحدة فى سورة الأحزاب
يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ۚ ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ ۗ وَكَانَ اللَّهُ غَفُورًا رَّحِيمًا.. ودى سمعت لها تفسير انها أمر مشروط يعنى اللبس ده بغرض الحماية لأن كان فى حروب واعتداء على النساء وكانوا بيقولوا بعدها مكناش نعرف انهم مسلمات، وفى كمان تفسير ان الآية نزلت للتفرقة بين الحرة العفيفة والأمة الغير عفيفة عشان محدش بردو يعتدي على الحرائر.. فربنا طلب من سيدنا محمد عليه الصلاة والسلام ان النساء فى عصره يلبسوا لبس مميز.. وصاحبتي قالتلي طالما مفيش خطر على الستات دلوقتى يبقى مفيش لازمه للبس ده..
=ماشي حوافقك على التفسير ده مع ان فى غيره، بس خليني معاك واحدة واحدة للآخر..
ايه بقى رأي صاحبتك فى الآية التانية وهى غير مشروطة؟
- الثانية سورة الأحزاب “وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا ۖ وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ ۖ وَلَا يُبْدِينَ زِينَتَهُنَّ”
وقالتلي انها اقتنعت ان الغرض من الآية الأمر بتغطية فتحة الصدر.. لأنهم كانوا اصلا بيلبسوا حاجات على الرأس وفتحة الصدر مش متغطية فربنا قالهم غطوها مش اكتر من كده..
=ماشي يا ستى، لو افترضنا أن الغرض من الآية الموجهة للمؤمنات هو تغطية الصدر فقط مش الرأس، ليه ربنا قال خمورهن؟ ودى كلمة مباشرة معناها فى اللغة غطاء الرأس وملهاش اى معنى تانى.. مش كان ممكن الآية تكون من غير الكلمة دى وحيبقى معناها فعلا تغطية الصدر بس زى ما بتقولك؟ والأهم من كلمة خمورهن الكلمة والحرف اللى قبلها “يضربن ب” يعنى “ينزلوا غطاء الرأس نفسه”..
هو انا لو بنتي لابسة طرحة وجزء من صدرها باين وقولتلها غطى صدرك بالطرحة اللى على رأسك، يبقى معنى كلامى شيلي الطرحة من على راسك وغطى صدرك ازاى؟
وبعدين يا ستى حنروح بعيد ليه اقري باقي الآية بالكامل حتلاقي فيها طلب للستات انهم ميتزينوش إلا لناس محددة مش ده تأكيد ان الغرض من الآية كلها هو الحشمة والستر للاغراب بشكل مختلف عن الأهل؟ ومتنسيش ان أول سورة النور ربنا قال “سُورَةٌ أَنزَلْنَاهَا وَفَرَضْنَاهَا وَأَنزَلْنَا فِيهَا آيَاتٍ بَيِّنَاتٍ لَّعَلَّكُمْ تَذَكَّرُونَ” يعنى ربنا بيقولنا الأوامر اللى فيها فرض والآيات اللى فيها واضحة وافتكروا.. وكأن ربنا بيقولنا انا عارف ان فى ناس حتشكك فى وضوحها..
- طيب، ما السورة فيها أوامر تانية زى حد الزنا مثلا ومش بتتنفذ رغم أنها فرض زى ما بتقولي.. اشمعنى الحجاب بالذات اللى بنركز عليه فيها؟
= حد الزنا ده مش أمر فردى.. ده أمر مجتمعى لازم الدولة تقرره.. ولو الدولة مخدتش بيه، انت مش حتتحسبي عليه، لكن الحجاب ده أمر فردى.. انت اللى حتتسألي عنه.. والمهم اننا اتفقنا انه واضح فى القرآن وانه فرض.. قرارك بلبسه او خلعه هو قرارك انت ومحدش له اى حكم فيه غير قلبك وعقلك وعلاقتك بربنا اللى محدش يعرف تفاصيلها غيرك..
-طيب واشمعنى احنا يا رانيا والأديان التانية لأ؟
= تعرفي ان إجابة سؤالك ده اكبر دليل على أن الحجاب مش اختراع اسلامى للتحكم فى المرأة زى ما بيقولوا المعترضين عليه.. الحجاب موجود فى العهد القديم وعشان كده اليهود الأرثوذكس تلاقي الست فيهم وبنتها مهما كانت صغيرة مغطية شعرها وجسمها كله ولابسه واسع كمان.. لما بشوف حد منهم فى امريكا بحس ان حجابهم احسن من حجابي.. وفى آيات فى العهد الجديد عن تغطية الجسم والشعر والمسيحين المتدينين فى مصر مثلا لبسهم حشمة جدا ولو تفتكري الستات المسيحيات بيغطوا شعرهم وهم رايحيين الكنيسة.. حتى هنا فى امريكا لبس الستات كان محتشم جدا واللبس المفتوح كان غلط وغير مقبول لحد آخر ٦٠ سنة تقريبا بس.. يعنى الحجاب مش اختراع اسلامى.. ولو دورتي حتلاقي ان ستر جسم الست فضيلة فى أغلب ديانات الأرض حتى الغير ابراهيمية.. لأن جسم الست غالي وله قيمة كبيرة وأثر كبير..
وبعدين انت لو فكرتي شوية حتلاقي ان صعب جدا بل مستحيل إن كل أئمة الدين الاسلامى باختلافهم من عهد الرسول لايامنا دى واللى منهم وصلنا الدين كله اصلا، من اول القرآن والاحاديث وأصول الفقه ومذاهب الفقه ولحد كل فرق الدين سنة وشيعة ومعتزلة وغيرهم، و٩٩% من الشيوخ المتخصصين فى المدارس والجامعات والمراكز الإسلامية فى كل العصور والبلاد يكونوا اتفقوا على فرضية الحجاب فى الاسلام بالغلط!!
ولو صاحبتك قالتلك ان انت مش حتاخدى ثواب على الحجاب قوليلها ان ربنا اللى انا اخترت اعبده أكرم من انى اعمل حاجة عشانه حتى لو مش فرض وميدينيش عليها ثواب كبير.. اذا كان الأكل والشرب مش فرض ومش عبادة اصلا، بل على العكس هم ضرورة للحياة لكن لو اكلتي بنية صحة جسدك عشان تعمري بيه الأرض وتعبدي بيه ربنا حتكون كل لقمة وكل شربة ماية ثواب.. وهكذا فى كل حاجة ممكن تعمليها فى الدنيا لو كانت نيتك فيها لله.. “من ترك شيئا لله عوضه الله بخير منه” ده لو اى شيء فما بالك بالتنازل عن حاجة بتحبيها وبتسعدك عشانه او عشان بتفكرك بيه.. النية بس حيكون أجرك عليها كبير من أكرم الأكرمين وحيعوضك بحب اجمل وبسعادة اكبر فى قلبك.. افتكري ان هو قال “أنا عند ظن عبدي بي وأنا معه حين يذكرني، فإن ذكرني في نفسه ذكرته في نفسي، وإن ذكرني في ملإ ذكرته في ملإ خير منه، وإن تقرب إلي شبرا تقربت منه ذراعا، وإن تقرب مني ذراعا تقربت منه باعا، وإن أتاني يمشي أتيته هرولة”.. لو حجابك بنية القرب حيقرب هو منك اكتر.. ولو حجابك بنية انك تذكريه بيه، ربنا حيذكرك فى كل لحظة تكوني لابساه فيها..
_طيب ليه ربنا مقلناش على الحجاب بطريقة محددة فى القرآن؟ وايه المشكلة لو قررت البس حشمة بس من غير طرحة؟
= بصي يا ستى..فى شيوخ حددوا طريقة لبس محددة بس فى النهاية انا شايفة انت كمسلمة حرة فى طريقة فهمك للآية او فى طريقة تطبيقها.. كل ست بتلبس عشان تخرج بييقى عندها احساس تقدر تعرف منه هى بتلبس ايه ولمين وليه.. يعنى نيتك اللى بتحدد لبسك هى اللى حتتحاسبي عليها وكأن ربنا ساب الآية مفتوحة وحدد فيها الشعر وفتحة الصدر ووصف الزينة اللى هو عام، عشان يدى فرصة لعقلك وقلبك ونفسك يقرروا انت حتلبسيه ازاى!! وعشان كده انا مينفعش اقول ان واحدة بتاخد ثواب اكتر من واحدة فى اى حاجة لها علاقة بلبسها لأن لا يعلم النوايا إلا الله..
بخصوص سؤالك انك تلبسي حشمة وتشيلي الطرحة، حقولك على نقطة مهمة جدا ممكن تساعدك فى اى قرار حتاخديه له علاقة بالحجاب خلعه او تغير الاستيل فيه مثلا أو غيره.. فكري كده الخطوة دى حتقربك من ربنا ولا حتبعدك عنه؟
لو حتقربك يبقى اكيد خير ومتتردديش، ولو حتبعدك عنه بلاش تعمليها.. وافتكري ان مفيش حد حوالينا شال الحجاب وفضل لابس حشمة ومتغطى وواسع طول الوقت.. والا الشيطان مهمته ايه فى الدنيا؟
انا مثلا كنت فترة مش محجبة ورغم ان لبسي كان محترم إلى حد كبير، لكن فى استثناءات زى المصايف والأفراح والسهرات.. ورغم انى كنت متدينة قبل الحجاب وبصلي وبصوم لكن قراري بالحجاب بلا شك قربني من ربنا اكتر كتير وخلانى احس انه معايا فى كل لحظة.. خلانى احب ربنا اكتر وبالتالي احب كل خلق ربنا اكتر مهما كانوا مختلفين عنى..خلانى ارتبط اكتر بهويتي اللى بحبها وبقدرها.. بأني سيدة مسلمة..
تفكيرنا فى أثر الخطوة اللى عايزين نعملها على قربنا من ربنا علامة ممكن نعرف بيها ونشوف الصح والغلط لما نتوه ونتلخبط..
الانسان جسم وروح.. الجسم من الأرض والروح من السما وعلاقتهم ببعض عكسية رغم انهم فى نفس الحيز.. كل ما بتهتمي بالأكل والشرب والنوم والفسح والبشر وبجسمك وشكلك وشعرك ولبسك عشان تعجبي الناس اللى كلهم مصدرهم الأرض نفسها، كل ما ده بيشدك للأرض وبيبعدك عن وصلة روحك بالسما ويصعب عليك العبادات وقرب روحك من مصدرها، اللى هو ربنا ..
ده قانون رباني على اى انسان..
وعشان كده الراهبات اللى بيقرروا يوهبوا روحهم لربنا مينفعش يعملوا كده إلا لو غطوا جسمهم كله وبعدوا نفسهم عن الناس.. ومن كرم ربنا علينا انه قالنا انكم ممكن تقربوا منى وانتم وسط اهلكم وصحابكم وبتروحوا شغلكم وبتتجوزا وتخلفوا..
بس المهم اننا نعمل ده واحنا بنهتم ان ربنا يكون فى قلبنا أولا وقبل اى حاجة تانية فى الدنيا.. ونهتم اننا نعمل اللى يقربنا منه ونبعد عن اللى يبعدنا عنه..
وفكري نفسك ديما ان الدنيا قصيرة جدا وان كلنا حنموت وهم كام سنة حنعشهم وعلى أساس عملنا فيهم حيكون المكان اللى حنخلد فيه بعدهم جنة او نار، بيبتدى المكان ده.من لحظة الموت اللى هى اى ثانية.. وفكرى نفسك إن الفتن بتزيد جدا، ولازم تقاوميها بأنك تظبطي ايمانك من اساسه..لأن ايمانك ده هو اللى حيخليك تتنازلى عن اى سعادة مؤقتة فى الدنيا نفسك بتزن عليها، بارادتك الكاملة عشان ربنا، وانت متأكدة ان ربنا شايلك احسن منها بكتير وللأبد..
لما تبقى عايزة تعملى حاجة غمضي عينيك وتخيلي انك حتموتي وانت بتعمليها ولو لقيتي نفسك راضية انك تقابلي ربنا بيها لأنها حترضيه عنك، اعمليها من غير تردد، لكن لو خايفة او قلقانة انك تموتي عليها، امسكى نفسك عنها واطلبي منه المساعدة بالدعاء وهو حيشلها من قلبك تماما..
ربنا يرشدنا لما يرضى ويثبتنا ويتقبلنا ويحسن خواتيم اعمالنا ولا يقبضنا إلا وهو راض عنا تمام الرضا جميعا يارب العالمين..
❤❤❤❤❤❤